AMURRIOKO UDALAK AZAROAREN 2RA ARTE JASOKO DITU HERRITARREK AURREKONTU PARTE-HARTZAILEETARAKO EGITEN DITUZTEN PROPOSAMENAK

• AmurriokoEKIN kanpaina berriari esker, Amurrioko herritarrek udal-aurrekontutik 430.000 € zertan inbertitu erabaki ahal izango dute.
• Proposamenak era birtualean edo aurrez aurre aurkeztu ahal izango dira. Horretarako, etxe guztietan liburuxka bat postontziratuko da, proposamenak egiteko erantsitako galdetegi batekin; gainera, online ere bidali ahal izango dira.

Amurrio, 2021eko urriaren 19a. Amurrioko Udalak AmurriokoEKIN aurrekontu parte-hartzaileen prozesuan amurrioarrek sartu nahi dituzten proposamenak bilduko ditu bihartik, urriaren 20tik, aurrera. Prozesu irekia da, udalerriko biztanleek udal aurrekontuko 430.000 euro erabiltzeko moduari buruzko ekarpenak egin ditzaten. Proposamenak aurkezteko epea azaroaren 2an amaituko da.

Amurrioko Udalak AmurriokoEKIN prozesua jarri du martxan berriro, herritarrek 2022an 215.000 € eta 2023an beste 215.000 € zertan inbertitu erabaki dezaten. Aurten, berritasun gisa, aurrekontuaren zati bat 48.000 eurotik gorako aurrekontua duten proposamenetara bideratuko da, eta beste zati bat 48.000 €-tik beherako proposamenetara. Horrela, lehen urte honetan 48.000 €-tik beherako aurrekontua duten proiektuetara bideratuko da, eta 2023rako, proiektuei forma emateko denborarekin jadanik, proiektu handiagoak gauzatuko dira.

“Udaletik aurrekontu parte-hartzaileen AmurriokoEkin prozesua martxan jarriko dugu berriro, eta herritarrak prozesuan parte hartzera animatu nahi ditugu. Guretzat oso garrantzitsua da Amurrioko herritarren ikuspegia kontuan hartzea, herriaren etorkizuna planifikatzeko”, azaldu du Txerra Molinuevo Amurrioko alkateak.

16 urtetik gorako amurrioarrek nahi beste proposamen egin ahal izango dituzte. Aurkeztutako proposamenek baldintza hauek bete beharko dituzte: Amurrioko Udalaren eskumenekoak izatea; ikuspegi teknikotik bideragarriak izatea; urte bakoitzerako ezarritako gehieneko aurrekontuaren barruan sartzea, 215.000 euro gainditu gabe; interes orokorrekoak, eta ez pribatukoak izatea; eta, horrez gain, gobernu-taldeak ezarritako mugak errespetatu beharko dituzte, hauek ez kaltetzeari dagokionez: ekitatea, euskara, osasuna eta jasangarritasuna.

Parte hartzeko bideak

Proposamenak azaroaren 2ra arte aurkeztu ahal izango dira, era birtualean edo aurrez aurre. Horretarako, Amurrioko etxe guztietan liburuxka bat postontziratuko da, erantsitako galdetegi batekin. Liburuxka horiek udaletxean, Bañueta kiroldegian eta Kultur Etxean dauden postontzietan utzi ahal izango dira, edo Herrilaguntzaileei entregatu ahal izango zaizkie parte hartzeko aldian. Azoka egunetan karpak jarriko dira San Anton plazan, parte hartzea errazteko. Gainera, online ere parte har daiteke Amurriokoekin webgunearen bidez, edo posta elektronikoz partehartzea@amurrio.eus helbidean.

Faseak

Aurrekontu parte-hartzaileen AmurriokoEkin prozesua lau fasetan gauzatuko da: proposamenen aurkezpena, proposamenen lehenespena, bideragarritasunaren azterketa, , eta bozketa.

Proposamenak jaso ondoren, Udalak prozesuan parte hartzeko ezarritako baldintzak betetzen dituztela egiaztatuko du, eta, ondoren, lehentasunei buruzko fase bat egingo da. Fase horretan, 48.000 €-tik beherako kostua duten 10 proiektu, eta 48.000 €-tik gorako kostua duten beste 10 proiektu hautatuko dira. Lehentasunak aurrez aurreko saio irekietan ezarriko dira, irizpide hauetan oinarrituta: proposamenak biztanleriako sektorerik ahulenei (langabetuak, adinekoak, emakumeak, migratzaileak, dibertsitate funtzionala duten pertsonak…) mesede egiten edo eragiten al die? Eta proposamenak ingurumena eta klima-aldaketaren aurkako borroka hobetzen edo indartzen al du? Ondoren, lehenetsitako proposamen horien bideragarritasuna aztertuko da, eta abenduan eta urtarrilean herritarrek proposamenak bozkatuko dituzte.

Amurrioko Udalak amaiera eman dio 2018ko apirilean martxan jarri zen partaidetzan oinarritutako AmurriokoEKIN aurrekontuen prozesuaren bigarren faseari. Bertan, udalerriko biztanleek, aurrekontuaren 430.000 euro nola inbertitu erabaki dute, proposamen irabazleak aukeratuz. Guztira 13 proposamen gauzatuko dira, 5.000 eurotik beherako aurrekontua duten proiektuei zuzendutako partidan jasotzen diren 10 eta  5.000 eurotik gorako aurrekontua duten 3.

Proposamen finalisten herri bozketa prozesua abenduaren 12tik urtarrilaren 4ra luzatu zen. Epealdi horretan, 951 pertsonak, botoa eman ahal izateko baldintzak betetzen zituzten Amurrioko biztanleen %10,9ak, beraien botoa eman zuten, horretarako zeuden bideak erabiliz. AmurriokoEKIN ekimenaren lehen edizioarekin alderatuz, partaidetza ia hiru puntu altuagoa izan zen. Zenbaketan 89 boto baliogabe egon dira.

Boto gehien jaso duten proiektuak hauek izan dira:

5.000 eurotik gorako aurrekontua dutenak

1. Etxegoien kalean konponbide integrala egitea, aparkaleku bat eginez eta kale honetako aparkatzeko bi ilaratatik bat kenduz. 300.000€
2. 24 orduko kamerak jartzea segurtasun arazoak dituzten udalerriko puntu estrategikoetan. 30.000€
3. 0 eta 12 urte arteko umeentzat ludoteka egokitzea, zenbait gunerekin. 38.000€

Horrez gain, laugarren lekua lortu duen proposamenari, Amurrioko bidegorri sarea hobetzeari, hasiera emango zaio, 32.000 eurorekin. Horrela, proposamen horietara zuzendutako 400.000 euroak lortuko dira.

5.000 eurotik beherako aurrekontua dutenak

1. Parke linealean iturriak jartzea, Zabalibar kaletik gertu. 4.800€
2. Mahai gehiago jartzea udako igerilekuetan. 3.000€
3. Baranda bat jartzea Udaletxeko plazako farmaziako eskaileretan. 750€
4. Liburutegirako beste hiru ordenagailu erostea. 3.500€
5. Ispilu bat jartzea Juan Aranoako irteera hobetzeko. 600€
6. Abiadura 30 km/h-ra murriztea Landaburu/San Joseko Amurrioko sarreran/irteeran. 4.600€
7. Eserlekuak jartzea “Mariaren Bidean” (Cerrajeria kalea), atseden hartu ahal izateko. 3.000€
8. Bizikletak uzteko lekua egokitzea Reforretik gertuko poligonoan (Kirtana zentroa). 2.000€
9. Zenbait jarduerarako musika ekipoa Nagusien Etxean. 4.100€
10. Proiektore bat Nagusien Etxerako. 800 €

Horrez gain, hamaikagarren tokian geratu den proposamenetik, Iparralde atzealdean paperontziak jartzea, proiektatutako parte bat (2.850€) egin ahal izango da, proposamen horietara zuzendutako 30.000 euroko aurrekontua osatzeko.

“Herritarren partaidetza ezinbestekoa da horrelako prozesuetan eta, horregatik, fase guztietan beraien prestasuna erakutsi duten Amurrioko biztanleen partaidetza eskertu nahi dugu. Une honetatik aurrera, administrazio kudeaketa epealdia irekiko da, 2019-2020 epealdian gauzatuko diren emaitza horiei forma emateko”, adierazi du Txerra Molinuevo Amurrioko Udaleko alkateordeak.

• Talde Motorra eratzeko bi bilera antolatu dira, martxoaren 7an eta 15ean
• Lan taldearen egitekoa ezinbestekoa da lehentasun irizpideak eta proposamenen gainbegiraketa definitzeko

Amurrion, 2018ko martxoaren 1ean. Amurrioko Udalak, partaidetzan oinarritutako aurrekontuei buruzko AmurriokoEKIN programaren beste edizio bat jarriko du martxan, bigarren urtez jarraian. Horretarako, prozesuaren jarraipena egingo duen eta funtsezko alderdien inguruko erabakiak hartuko dituen lan taldea eratuko da.

Partaidetzan oinarritutako aurrekontuen prozesuari hasiera eman aurretik, deia egiten zaie talde motorrean parte hartzeko interesa duten pertsona guztiei. Horretarako, bi bilera antolatu dira Talde Motorra eratzeko, martxoaren 7an eta 15ean, Katekesiko Aretoan, arratsaldeko 18:30ean. Talde hori, Amurrion bizi diren pertsonek osatuko dute, eta elkarteren bat ordezkatuz edo norbanako gisa hartu ahal izango dute parte.

Lehenengo saioaren helburua Partaidetzan oinarritutako aurrekontuen prozesua, Talde Motorraren egitekoak, 2018an taldeak izango duen gutxi gorabeherako egutegia azaltzea eta sortu daitezkeen zalantzak edo gaiak argitzea izango da. Saio horretan, interesatuta dauden pertsonek izena eman ahal izango dute, taldeko kide izateko. Interesatuta dauden pertsona berriek 2017ko Talde Motorra osatzen dutenekin egingo dute bat, gehienez ere 30 pertsonako taldea osatzeko. Talde Motorra dagoeneko eratuta egongo den bigarren bileran, edizio honetan erabili beharreko lehentasun irizpideak zehaztuko dira.

Bileretara joan nahi izanez gero, komenigarria izango litzateke aurretik baieztatzea 945 891 161 telefono zenbakira deituz eta Ana Izquierdo Udaleko Partaidetza Teknikariarengatik galdetuz edo partehartzea@amurrio.eus helbide elektronikora idatziz.

Talde Motorraren egitekoa funtsezkoa da partaidetzan oinarritutako aurrekontuetan. 2017an egindako edizioan egiaztatu ahal izan zen bezala, talde horri lehentasunezko irizpideak definitzea eta bateratu beharreko proposamenak gainbegiratzea egokitu zitzaion, beste gai batzuen artean.